Металика мој најдобар другар

Најголем дел од интелигентните и талентирани тинејџери одбираат да слушаат хеви метал, покажуваат новите истражувања, кои како причина ја посочуваат катарзичната моќ на овој вид музика.

Во студијата спроведена од Стјуарт Кадваладер и Џим Кембел од Националната академија за талентирана младина при Универзитетот во Ворвик, бил регистриран голем број на студенти кои го селектирале хеви металот како свој омилен музички жанр.

Постои општоприфатено верување дека надарените студенти го минуваат времето читајќи книги и слушајќи класична музика, но истражувањето покажа дека тоа е само погрешен стереотип. Испитаните 1.000 студенти на возраст од 11 до 18 години, кои се дел од 5% најпаметни луѓе во цела Британија, го побија верувањето дека т.н. металци најчесто се деликвенти и необразувани личности.

Студентите требале да ги опишат своите семејства, ставот кон образованието, своето хоби и предностите на медиумите а потоа и да ги рангираат жанровите музика кои најчесто ги слушаат. Од резултатите јасно се видело дека рок музиката е најпопуларниот тип на забава, но и дека постои одредена поврзаност помеѓу музиката која ја слушаат младите и нивните животни ставови.

Авторите на истражувањето тврдат дека оние на кои металот им е омилен издувен вентил, имаат недостиг на самодоверба, проблеми во односите со семејството и потешкотии при склопувањето нови пријателства. Некои од анкетираните студенти признале дека ја користат хеви метал музиката за да се справат со притисокот кој им го предизвикува нивната интелигенција, но и со фрустрациите и гневот кој секојдневно го чувствуваат.