Борбата за местото регионален лидер помеѓу аеродромите се повеќе се разгорува. Аеродромите во Белград и во Загреб речиси рамноправно се кандидираат за оваа позици1ја, а во трката не треба да се занемари ни Љубљанскиот, кој во минатата година интензивно работеше на развојот, посебно на товарниот промет, објави хрватскиот весник „Пословни“. Загребскиот аеродром има перспектива и големи развојни планови, Белград веќе тргна во темелна реконструкција, а Љубљана го бара своето место најмногу со карго прометот. Работењето во првите десет месеци од 2006 покажува дека аеродромите за разлика од повеќето авиокомпании станаа многу вносен бизнис. Се побројните летови и патници им носат зголемен приход, додека растечките трошоци за гориво и јакнењето на конкуренцијата негативно влијаат на добивката на авиопревозниците. На аеродромот „Плесо“ во Загреб лани се регистрирани 1,45 милиони патници, што е за 9,6 отсто повеќе од 2005, а бројот на летовите е зголемен на 34.688, што е 8,5 отсто повеќе. Во Хрватска има девет аеродроми, а во Загреб се прифатени една третина од патниците. Преку аеродромите „Никола Тесла „ и „Брник“, во Белград и во Љубљана, оди целокупниот авионски превоз во овие земји. Во Загреб многу очекуваат од амбициозниот план за изградба на нов терминал, кој ќе чини 212 милиони евра. Американската компанија „Дин корп“ ја откажа инвестицијата од 100 милиони долари во карго центар на аеродромот „Никола Тесла“ во Белград. Србија го раскина договорот со Американците бидејќи тие побарале негово менување и најави нов конкурс. Профитот на белградскиот аеродром во изминатите 2,5 години е зголемен од еден милион на девет милиони евра. Во 2006, бројот на патниците изнесуваше 2,03 милиони, а на летовите 40.000. Приходите се поголеми за 21 отсто, а продуктивноста по вработен за 41 отсто, што е голема болка за загребскиот аеродром кој има солидни приходи, но поради вишок вработени има помала добивка. На аеродромот во Љубљана во првите десет месеци од 2006 имаше 1,17 милиони патници, што е 10 отсто повеќе од претходната година. На „Брник“ се регистрирани 24.424 летови, а најголем пораст има кај товарниот превоз од 24 отсто. Управата на аеродромот очекува во идната година поголем број на патници за седум отсто, 16 отсто повеќе товар и 14 отсто повеќе авиони.izvor: vest